10 قصائد مكتوبة من اجمل ما كتبت اميرة البيلي 🌼

1 - " الشعراء يتبعهم الغاوون "

وأنا يعني شاعر غاوي نص الشِعر ..

لا هجيت فلان بالسب والباطل ..

ولا كنت عاطل وكتبته لجل السِعر ..

مكتبتش الفصحي لكني حبيتها ..

رغم إن بيتها يساع بشر غيري ..

ولا عمر كان سيري علي عكس ما بكتب ..

الشِعر كان وطني وأنا عمري ما اتغربت ..

ولقيت فـ قلمي سبيل فـ مسكته فـ اتشربت ..

"الشعر جرح وعمره ما بيتلم "

 كل الي صابه الشِعر كان شِعره زي الدم

والدم مش بيجف ، الشِعر مش اسفاف ..

وانا قلمي مش بيسف ..

كان في فلان بينكوا صابه الفراق كتبه ..

من غير ما يجبر حبر الوجع ع السرد ..

الشِعر زي النرد بيصيبنا عشوائي ..

اختار فلان يكتبه واختار فلان يقراه ..

الشِعر مش إكراه ..

ولا عمره كان اوزان وقوافي أو الفاظ ..

قالوا عليه الماظ والحلو لمعانه ..

كتبوا كتير فـ الشِعر وبحوره والوانه ..

والكل عرف معني كلمة شِعر علي كيفه ..

الشِعر جار محترم يكرم أوي ضيفه ..

الشِعر بنت وبكر من يومها

فضي غشائها الوجع والجرح والفرقة

فحدث نزيف م الحبر ع الأوراق ..

الشِعر طعنة صابتني بعد فراق ..

أنا شِعري بالغ موصلش سن الرشد ..

لكن جروحي كهلة من يومها ..

بتربص الأوجاع علشان مليش دونها ..

كل الي داق الشِعر رافض يكونله بديل ..

قد قال فؤاد حداد :- الأرض شاعر يفتح زهرة المواويل ..

الشِعر كل جميل صابه الوجع شقاه ..

الشِعر اكياس دم بنطلعه لله ..

ونعاني من فقره لكنه ميجفش ..

الشِعر ميكفش وجروحنا غاوية تفيض ..

الشِعر شيخوخة وصابتنا بالتجاعيد ..

قالوا الي كتب الشِعر مكتبش عن نفسه ..

ازاي هيكتب جرح لو يعني مش حسه ..

كل الي كتب الشِعر داق منه كل المر ..

الشِعر سجن الحر والحر حر فـ شِعره وكلامه ..

الشِعر تأبيده والجرح سجانه ..

الشِعر غيمة اتكونت من فيض دموع

 طلعت لفوق اتكثفت نزلت مطر

الشِعر ابدا مش خطر

الشِعر رغم الوجع هو الملاذ والحصن والملجأ ..

من غير بيوت الشِعر هروح لمين والجأ ..

الشِعر مش عادة الشِعر كان مبدأ

وكل شاعر له قانونه فـ تعبيره عن وجعه ..

كل الي ائمن للحياة جرح الحياة لدعه ..

الشِعر امرأة العزيز والفرحة كاتـ يوسف ..

زوليخة شوقها ازداد من فرط احزانها ..

كان نفسها فـ يوسف لو يجيي قدامها ..

ولما جه يوسف الشِعر راود الفرحة عن نفسها فـ استعصمت

علشان كدة اغلب بيوت شِعري سُكانها م الأحزان ..

طب ليه يارب خلقتني شاعر ، دة الشِعر لو صاب البدن ادمان

كان عندي حلم زمان اكبر واكون دكتور واشخص الأمراض

كبرت بعض الشئ فـ ظهر عليا اعراض

عنيا بتدمع من كل شئ ولا شئ ببكي بدون داعي

الاكتئاب بيزيد والشِعر كان ساعي بيخدمني لما أتعب ..

بتصبني نوبة خوف وفوبيا م المخاليق ، وسهل خلقي يضيق

وسهل اكون بارد ، وكتير بكون شارد وكتير اوي بتصاب بالسريالية فبهدم المنطق ، بتصبني حالة لا شعور بكل شئ فيا اتكسر ، عن عمد بتناسي فيجيي الليل فـ أكتب كل شئ صابني

الشِعر عابني وقالي خد بالك أنا بس هبقالك فإياك تأمن لأي شئ دوني ..

الشِعر كان عوني وأنا بردوا رحتلهم ، قالوا إن أنا غيرهم

وسابوني كالعادة ، رجعت ليه ندمان وكتبت ما تيسر من وجعي وسردته ..

انا طفل من عادته يبكي كتير اذا خاف ، بكتب بدم رصاص علشان مليش ف الجاف ..

كل الي عاشني اهو شاف ، إني ضعيف جدا ..

واذا يوم حاولت اضحك ، فجر الوجع يدن ..

وبعود حزين تاني ، ملعون ابوه الحب اذا روحي هتعاني

الصحبة خير دليل علي اني وحداني ، الحب حزن شديد والشدة مش فيا ، جايز اكون تلفان او عاصي متحبش ، لكني حبيته ..

الشِعر ساب بيته وجالي لجل اكتب ، رتبت فوضي كتبتها واسميته شِعر ..

فـ الشعر صدق انه شِعر من كتر احزاني ، ف سردت ما اشعر فـ لقيته قدامي ، انا كنت بكتب يومها ع الفرقة ، وأنه وحشني وقلبي مش ولابد ..

كان نفسي يومها يرد ، وناديت وما لبي ..

انا كنت بتخبي ، فـ الشِعر من قسوته ..

وجحوده ، اهماله ، انا كنت بقياله ..

وهو كان حالف يدوس اوي ويغيب ..

أنا كنت ماسكة بسيب من كتر ما بيشد ..

أنا كنت بنساله وهو كان بيعد ، فـ اخطائي

لجل يبيع بضمير يكون مرتاح ..

أنا كنت بدي كتير ، وهو كان سواح لكل شئ غيري ..

كتر أوي خيري والله ما بزايد ..

كان يطفي فيا بغِل واكونله نور قايد ..

وأرجع لحضن الشِعر فـ يضمني فـ سكون ..

الحب مش مضمون ، مضمون كلامي الشِعر ..

دة لأنه خِل امين ، مين باقي يوم علي مين ؟

الشِعر كان باقي ، وهو ساب ايدي ..

اديته حب زيادة عن حدة ، فـ رمالي سمه

وزاد فـ تجاعيدي ..

واذا قلنا بلاش تبقولنا ورديين فـ أي بداية فـ حياتنا

عشان الغلب بيخلينا نتعشم فـ بنصدق ..

فـ خلوا عندكم مبدأ ، ومتدخلوش جوفنا طول مانتوا هتسيبوا ..

غبي الي يقول حلاوة الحب تعذيبه ..

غبي الي يظن إن الصحبة هتفيده ..

غبي الي يحط للناس سِعر ..

غبي الي يسيب حياته لشئ سوي للشِعر ..

..........................................

2 -  " حلالي "

بوجه شكر للقهوة الي خلتني اكون جنبك ، ومش ذنبي ومش ذنبك بأن قلوبنا دقوا لبعض ..

دة ربك لو يشاء يجمع ما بين اتنين بيجمعهم ، وربك شاء وجمعنا برغم " البعد " ..

ورغم " القرب " فـ المسافات وإن الشات ما بينا كان كلام عادي ، مكانش البادي هو الحب ، كأي اتنين صحاب يعني ، مكاتش الدنيا بتساعني لكن وسعتلي فـ عيونك ، وحاوطتني فـ يومها كمان ، كلامنا بدايته عادي هزار هزاري كان علي الدخان ، سجايرك وحشة عـ الصحة ياريت نتلم يا اخينا ، وكان فينا كلام أو خنقة مكبوتة حكالي بعض اوجاعه ، كأن وجودي بيساعه وكل ما يحكي بيدمع كأنه طفلي والله ، قعدنا يوميها ست ساعات بنتكلم وبنهزر بنتجنن ونتمنظر بحبة ألش حافظينهم ، وحبه شعر كاتبينهم انا وهو ، وشفته بجد من جوا " نضيف جدا " وتايه جوا اشغاله ، مكنش ف بالي إنه فيوم يشوفني ام لعياله ،

- بمحض الصدفة هذا اليوم كان يوم " 3 " فـ شهر اكتوبر سبحان من خلق الصدف كان عيد ميلاده بعده بس بيوم ثم اتقابلنا وكان عيونه يومها غاوية تبصلي ، انا قلبي كان بيدق لو شافه ، وعقلي كان بيقولي متحبيش ، رغم أني كنت بعيش لو شفته بيهزر ، ورامي هامه وحزنه ويايا ، حكمت قلبي لقيته جوايا ، ومرة فـ التانية ، الوقت عدي كأنه كام ثانية ، والحلو طَب وحَبني " قال جملتين " عايزك حلالي وقلبي شايفك كل شئ ، وأن كان طريقي صعب او بيضيق ، فـ انتي السند والاهل ، مكنش طبعا سهل اني ارجع اطمن بعد الوجع والخوف ويشاء قدرنا نشوف هذا الأمان فينا ، وانا قلبي شافه امان وطريق بيهدينا للصح أنا و روحي ، خيط جروحي بضحكته البمبي ، كان لو يكون جنبي ، النبض فيا يزيد ، واعيد ف اي كلام مهوش مفهوم ، وبلهوجة طفلة اطمنِتله بجد ، طبيت انا وقولتله يا حلو حبيتك ، مش خايفة اكون ضلعك ، وقابله اكون بيتك ، خلتني اكون احلي ، وبحلو وانا وياك ، وإن قولت يا " روحي " بنسي الي فات والقاك ، حبيت حياتي معاك ، كل الي فات كان كوم و " حبيبتي " دية الي حياة ، كل اما اشوفه بقول والله بسم الله ، وأن قالي يا " ماما " بنسي الجميع ألاه ، وبكون كما طفلة رافضة الكِبر وياه ..

" شكر واجب فـ الختام "

- شكرا للبن البرازيلي علشان كاتـ أول مرة هناك ، شكراً لشهاب الدين جدا علشان كان سبب اني ابقي معاك ، شكرا لـ " وحيد جدا " علشان حبيت ، اسمع شِعرك بيها ،

و "مكنش الحل فـ بعادنا " ، قصيدة عظيمة خليها فـ بالك كل ما تشوفني وقولهالي عشان حباها ، دوناً عن نصوص الشِعر ..

- شكراً لهذا الحضن أو ضحكتك ليا شكراً لأنك حب صحي الي مات فيا ، شكراً لكونك زوج ، صالح هيبقالي ..

" شكرا لأنك سندي وحلالي "

....................................................

3 - " متلازمة خوف "

برغم أن البعيد شاعر ، مكتبش فيها الشِعر

ولا صاغ كلامه بالغزل ، الحب ليه بقي مبتزل ؟

والعشق فجأة اصبح روتين ، كل البشر فتارين ، والحب صار مانيكان ، بتغيره الألوان ومواسم الازواق ، كل الوفاق اتداق وغرامنا اصبح داء بيخُمنا جهراً بجماله فـ الأول ..

كان في يوميها اتنين بيعدوا من الشارع ، داير ما بينهم شئ وخناق بصوت عالي ..

كانت بتبكي بصوت ، وتقوله " افعالي " !!

-

" افعالي " ايه الي تغيرك بشكل دة ..

طب ليه مقولتش ف البداية أنك كدة ..

وأنك هتتعب قلبي بكلامك كتير !

بتقولي أنك جبت اخرك مني ليه ؟

مستني إيه ؟ امشي بدون ما تقول كلام مضمونه غاوي يهدني ، إياك تقول بتحبني

- سكتت لوهلة ، اتنهدت ، وقالتله منكملش ، العلة ناوية تزيد وانا قلبي مستحملش ..

بيرد بالتبرير وكلام كتير بينهم وعتاب ملوش لازمة ..

الغيرة مش ازمة ، العِلة فـ الأسلوب

كل الي كان مطلوب ، يعاملها بالحسني

ويرفِق على قلبها من غير " فروق النوع "

وأنه عشان راجل منشوفش منه دموع ..

وكلامه مهماً كان فـ لابد يتنفذ ..

وإن الولد قوام ع البنت جوا الدين ..

متقولهاش حابك طول مانت مش بتحب ..

الحب بيخليك كما طفل جواها ..

الحب بيخليك لين أوي معاها ، ومفيش ما بينكوا فروق

الحب يعني تفوق وتكونلها بيتها وامانها وابوها ..

مش بالزعيق تتحل ، ولا بالخناق الحل !

وإن كان قُليبك مل ، فـ امشي متوجعهاش

البنت حتة شاش ، تتلف علي جرحك ..

وإن يوم تزعلها ، والله ما مسامحك ..

" استوصوا بالنساء " متجوش علي قلوبهم ..

ولا تستهينوا فيوم بغبائكوا بوجودهم ..

-

" خلقت ضعيفة وقلبها اضعف "

فـ إياك تكون انت السبب فـ وجعها بكلامك ..

الشعر فاض فيا ولابد كنت اكتب ..

" إن الي بيحبِك ميسيبش بينكوا فروق .. "

وإن انت لو مليت ، سيبها بدون اعذار ، وكلام بيجرحها ..

خد بالك ان البنت حبت ومسكت فيك ..

متجيش عليها عشان م السهل تيجي عليك ..

- كان في ولد ساند علي الحيطة بيراقب الماشيين ..

كان ع الرصيف اتنين حاضنين ف ايد بعضهم ..

بيبص فـ عينيها ، ويقولها حابك ، وبلهفة يمسك ايدها ويبوسها .. ويقولها بالله " ماتغيبي عني فـ يوم " ..

حطت وجعها فـ كوم ، ووجوده كوم تاني ، حلفت تحبه عشان طمنها فـ ثواني ..

حلفت تكون جنبه " سنده وام وبيت " فقالتله أنا حبيت

الضحكة لو منك ، بتكونلي طفل

برغم 5 سنين الفرق بين سني مع سنك ..

بجنانه شالها ولف علناً بيها وسط الخلق ، نزلها ووعدها انه ميوجعهاش ، وانه عشق طيفها ..

وادمنها كـ النيكوتين .. مكنتش تعرف أنه عادي يبطله ..

بعفوية حبت كل تفاصيله وهزاره وضحكته ونظرة عيونه لما يلمحها ..

كان كل شئ بينهم جميل ، " علاقتنا هادية فـ متخافيش ، م الصعب اسيب الزعل يدخلنا ، أو اسيب حبيبتي فيوم تنام فـ عينها بدموع "

انا قلبي كان موجوع فـ شافه فـ اطمن ، طب ليه بقا يخون ؟ ويشك فـ كلامي ..

3 شهور عدوا وخناقنا غاوي يزيد ، الحب ليه تجاعيد بتصيبنا ف نعجز ..

دانا كنت هتعكز عليك ، ملقتش كتفك يومها يسندني ..

ووجعني بكلامه مش مرة كانوا كتير ..

وحصل كمان تغيير مبقاش كما هو ، ولا طفل من جوا ..

مبقاش فلان الدفي فـ عز المطر والبرد ..

الورد ليه اكليل وبقيت بشوف شوكه ، دخلت ليه قلبي لما انت طبعك وحش ..

ومشينا نتخانق وأبكي بصوت عالي ، فيقولي افعالك !

فـ بقوله افعالي !!

-

" افعالي " ايه الي تغيرك بشكل دة ..

طب ليه مقولتش ف البداية أنك كدة ..

وأنك هتتعب قلبي بكلامك كتير !

بتقولي أنك جبت اخرك مني ليه ؟

مستني إيه ؟ امشي بدون ما تقول كلام مضمونه غاوي يهدني ، إياك تقول بتحبني

- سكتت لوهلة ، اتنهدت ، وقالتله منكملش ، العلة ناوية تزيد وانا قلبي مستحملش ..

بيرد بالتبرير وكلام كتير بينهم وعتاب ملوش لازمة ..

الغيرة مش ازمة ، العِلة فـ الأسلوب

كل الي كان مطلوب ، يعاملها بالحسني

ويرفِق على قلبها من غير " فروق النوع "

وأنه عشان راجل منشوفش منه دموع ..

وكلامه مهماً كان فـ لابد يتنفذ ..

وإن الولد قوام ع البنت جوا الدين ..

متقولهاش حابك طول مانت مش بتحب ..

الحب بيخليك كما طفل جواها ..

الحب بيخليك لين أوي معاها ، ومفيش ما بينكوا فروق

الحب يعني تفوق وتكونلها بيتها وامانها وابوها ..

مش بالزعيق تتحل ، ولا بالخناق الحل !

وإن كان قُليبك مل ، فـ امشي متوجعهاش

البنت حتة شاش ، تتلف علي جرحك ..

وإن يوم تزعلها ، والله ما مسامحك ..

" استوصوا بالنساء " متجوش علي قلوبهم ..

ولا تستهينوا فيوم بغبائكوا بوجودهم ..

-

الحب لو هيضر فـ استئصلوا قلوبكوا ، واذا كان فلان بارد يا صبية متحبيش ..

بعد البرود اهمال .. " مالَك :- ياستي مفيش "

أسلوبه هيهينك ، فـ متقبليش الحب لو نهجه غير دينك ..

المعني والمقصود :- متقبليش الحب لو في ما بينكوا خلاف

قلبك فـ يوم لو خاف ، سيبي ايديه وامشي ..

يا صبية هيسيبك ، هيبيع بأرخص س

...............................................................

4: ويل لكل الي استحل الجرح للي بيعشقه ، علشان اناني ساب ايديه فـ عز احتياجه واختفي ..

ملعون ابوه هذا الدفي ، علشان بيجعل قلبنا ميخدش حذره من الي جي ، كل الي شاف الحب ضي اهو اتعمي ، الحب ايه غير ملحمة ؟ 

وإحنا الغلابة المهزومين ، طب انهي دين يشفعلكم علي جرح غيركم بالقوي .. 

دانا قلبي أصبح منطوي ومريض بوِحدة بتكسره .. 

كل الي جنبه بيخسره علشان ضعيف مش قدهم .. 

ذنبه الوحيد كان حُبهم ، علشان غبي ، مين يعني فينا كان نبي ؟ كل ابن آدم خطائين ، وانا غلطي عشمي فـ قربهم .. 

تباً لهذا الاحتياج ، بيهين في ناس ويذلهم .. 

وانا كنت بردوا فـ صفهم ، هما الي حطوني فـ خلاف .. 

واصروا اني علي اختلاف ، دانا عشت فيكوا سنين عجاف ..

وشبعت كدب ومرمطة ، طب ليه الفراق !! 

طب ليه بنيتوا عهود وفاق ، كان ايه لزوم الاتفاق نفضل سوا !

سُحقاً لحبك لو دوا ، تأثير دواك الجانبي صابني بمرض ملهوش علاج .. 

تباً لهذا الاحتياج .. 

علشان حوجني إني اسامحك الف مرة بدون مبرر منطقي .. 

غميت عيوني عن عيوبك واكتفيت ، بميزة زايفة مؤقتة ان انت بيت ، وأنك امان ، كل الي كان بان انه زيف ورجعت صدقته .. 

الكل حذرني وبعدت فـ احتاجته ، 

انا حبي غلب وغلبي جُب وكل حُب دخلت فيه ، انا وحدي بس طلعت وحدي وقلبي يومها اتداس عليه ..

......................

5 : " انا مليت " 

تعبت في قمت كلمته مانا بنته هيفهمني .. ويفهم اني محتاجة يكلمني ويسمعني ويفهم اني مخنوقة وحضنه بس هيساعني في كلمته

الو ؟

هو انت ليه ساكت ؟ ألو فيا حجات ماتت !

الو تعبانة في أسمعني ..

يرد يقول وايه يعني ؟

ما كل الخلق تعبانة ..وايه يعني ملامحك لسة بهتانة ما عادي كلنا مرضي ..جرحني بعجزي عن اني ارد القسوة ليه لكن .. انا قلبي مهوش داكن عشان يقسي ويكره حد.. مهواش حد فـ ليه جرح .؟ وزعلني ياريته ما رد ، وليه اتغير بقا بارد وليه شارد بعيد عني ما كان بيقول زمان اني مراته وام لعياله وقالي اني هبقاله انا باقية لكن هو الي بيعافر ليخسرني كسرني لكني حبيته.. ياريتني ما كُنت حبيته '(( وهبته القلب واديته حنين عمره ما كان يحلم بحد يحبه يوم قدي .. خلاص عدي ودوس علي كام مرة 💔وعيد من تاني في الكرة وعلقني بحبال بايشة مانا عايشة وهبلة وساكتة وبطنش كأن دموعي شئ عادي كأن فراقنا شئ عادي وهذا الوضع مش عادي فـ اسمعني انا ماشية ..انا كُنت فـ هواک طايشه ضعيفه وروحها كات بايشه وحالک لسه ميسُرش وحالي معاک مهوش ولابد يرد يقولي مش غلطان ومانتيش قادرة تتعاملي مع تعبي ')) انا مليت انا الهبلةةة اللي شوفتک بيت..وقولت ابويا وحبيبي يا سيدي كفاية والله دانا اتخميت وفكرتك هتبقالي السند والاهل مهواش سهل بأن البنت يوم تعشق ولو تعشق بتوهب روحها وحياتها وتتحمل وتتجمل عشان تحلوا في عيونه فـ ميبصش فيوم برا :")خلاص برا '(( انا استحملت ميت مره وسيادته غاوي يتعبني يا سيدي ما تمشي وتسيبني بـ تتعب قلبي ليه وياک ! بتكدب ليه وتتمارض وتتعصب وبتعارض وتخلق مُشكله تافهه.. دة قلب البنت لو شافها بتتكسر عشان واحد بيقفل وقتها بابه ومبيفتحش فـ متجرحش عشان قلبي شال ياما.. وبرجع تاني من الأول واعدي كلامه فيطول ويخلق فيا مليون شق وقلبي حقيقي مل الدق ألفت الموت وعايش زق ولسة سيادته بيحدف عليا الجرح.. ايجازاً فـ الكلام والشرح خبطني وموجه كان عالي يهاجم بس افعالي كاني عدو بيحاربه كإن القسوة كاس شاربه '((كان حقيقي حيلي اتهد وروحي اتنسلت من الشد ولية الشعر فعلا جد بيفتح في الجروح لينا وليه الحزن مالينا :") فـ حد يقولي ايه العلة ؟كإن القلب فيک كافر مالوش ولا دين ولا مله.. وهبتك ضلع احلامي عوجت الضلع فـ كسرته .. خسرت الكل علشانه واديني كسبت وخسرته ..كتبت الشعر من تعبي قراه لكنه مهتمش وكالعادة بيتغاضي ويتغابي وبيطنش .

مسكت الفون ، كتبت رسالة من تعبي بقوله فيها اخبارك ومبتسألش

مفيش داعي لأعذارك ، انا عارفة اني مش فارقة.. مجرد بس بطمن عليک يعني لـ وهله قلبي يوجعني واحس بإنه مش مُهتم كإن دموعي صارت دم نزيف متتالي مبيهداش.. انا مادة فـ دستور باش وبضحك بس من برا .. :")وروحي لسة مضطرة تبين عكس مافيها وفرحة روحي مش ليها ..ختاما للي من تعبه خلاص ناوي يغيب ويسيب..ان يوم قررت تروح لطبيب متجبش علاج.. علشان والله ما هيفيدك هيزيدك من وجعك اكتر. وكأنك بتحاول تمنع في كياك ان الدنيا تمطر.. ملخص كل ادويتك متتعشمش فـ اسمعني

ملخص كل ادويتك متتعشمش

بلاش عشمك يزيد يعني :')دة لما تعبت كلمته وقولت بأن انا بنته هيفهمني وابسط رد كان منه بأنه باعني ووجعني 💔

..... 

6 : يا أيها الناس الي ناموا معيطين ..
قلبي الحزين غاوي البكا طول النهار والليل .. 
طول عمري كنت بميل للضحكة واللهِ .. 
جم قربوا تجاهي ، فجأة بقيت معلول ..
مذلول بيطلب قربهم جنبه ، كان العشم ذنبه .. 
وغبائة كان عاصي ، غاوي ارتكاب الذنب .. 
زقوه الجميع علي جنب ، عن عمد قالوا غياب ! 
قفلوا عليهم باب ، عن قصد :- كله اختفي .. 
طب زدتوا ليه الجفا ، وجرحتوا في صميمه ! 
الغلب بيهينه ومسكْوا بيمينه رميتوه علي شمالكوا ! 
قام العبيط جالكوا ، سبتوه وهو عليل ! 
من غير سبب ودليل ، محتاج لاحضانكم !! 
ملعون أبوه العشم ، لو يوم دخل داركم .. 
بالله ما تتعشموا ، مرض العشم دباح .. 
كل الي دمه اتباح ، فـ الاصل كان بيحب .. 
والحب زاد غشمه ، فـ اتعشم الغلبان .. 
كل الي بات تعبان ، كان السبب عشمه .. 
الكل ابرة بنج ، بتخدرك لساعات ..
وأنا قطري عدي وفات ، والكل مركبهوش .. 
الكل مشيوا بعيد ، الصبر اهو .. بيبوش .. 
طال إنتظار الصبر فقد القُليب صبره .. 
مين يوم هَيجبُر قلب دخل الوجع جَبَره ! 
أنه يعشش فيه ، مين يوم هيجبُر قلب .. 
الحزن بيغطيه ،
 لُدِغ الغشيم من نفس ذات الجحر من تاني ..
واقف لوحده بعيد وبيعاني ! 
انا كنت هذا الشخص من فترة ، 
بالفطرة عندي سذاجة تكفي بلاد ، 
وكبرت ضعف ضعف من سني ..
دانا كنت لسة شباب ، قربتوا ليه مني ؟ 
ملعون ابوكوا وشوش سبتوني اكمني .. 
حبيتكوا واديتكوا حب وحنين زايد .. 
وطلعتوا من جوفي ، بقا دة الي كان فايد .. ؟ 
بعتوني بالساهل وكسرتوا شئ بيا ..
كان قربكوا لعنة واللعنة كات ليا .. 
علمته ضرب السهم ، حدف السهام فيا .. 
بلياتشوا بيضحكوا وقت الضيق واخدينه شماعة وجع ليكم .. 
وكأنه مش فيكم ، بتطنشوه عادي ..
ومكنش يوم بادي معاكم الا بـ خير  ..
رميتوه بدون داعي ، اقطعلكوا دراعي .. ! 
اذا كنتوا فاكرينه ، حاطينه جنب الحيط .. 
وكأنه خيط مركون ، جايز فيوم تتنسلوا فتجوله فـ يخيط ، 
القطع والعلة ، مسكوا عليه ذلة ، مش ليه ومش تبعه .. 
 اداكوا خير ببلاش ، وكانه ليكوا قماش شكلته فيه عـ القد
واحتاجكوا وقت الضيق ، لكن محدش رد ! 
مخزون مخاوفه تفيض ، والحب كانله وميض ..
مسك الوميض حرقه ، والحرق ساب علامات .. 
والجلد حتماً مات النار بتاكل فيه ، 
نورهم دية نار قايدة ، مين يعني هيطفيه .. 
كان عندهم إصرار ، علي انهم يأذوه .. 
ضافوا الجميع ومحوه .. 
وجعوه كتير لكن ، لسة الغبي بيحن .. 
يبكي بوجع ويئن ، والكل مش سائِل ..
يشكي الوجع يسمع :- معلش اتفائِل ..
 متقولش بيحبوك ، كل الذين اذوك .. 
قالوا فـ البداية كلام ، ولأن قلبك خام .. 
صدقت تفاهتهم ، كل الذين اذوك مانتاش فـ حساباتهم .. 

.....

7 : فـ " ديسمبر " فـ الشهر دة بذات ، كل الي فات ، والذكريات والخوف ، كل الظروف والبعد والإهمال ، قلبي الي شال فوق طاقته لجل الكل ، كل الي حبيتهم ، ولقيت وجودهم ذل ، كل الي مات فيا وكل الي موته ، كان في ضريبة جرح سددته ، داين تدان ولازلت بدفع فـ التمن ، الشهر دة لا يؤتمن علي قلبي ابدا كل عام ، أنا قلبي فعلا مش تمام ، ولازلت برجع وافتكر كل الوجع والحزن بالتفصيل ، انا لسة بيا عليل ملي وشي بالتجاعيد ، كل الي شايفه بعيد فكرته يوم سندي ، كل الي شفته امان ، زاد الوجع عندي ، ولا حد عاش ليا ، فـ الشهر دة بذات كل الوجع فيا ..

- صباح الخير علي من يهمُهم أمرنا .. :")

.... 

8 -  لا هحترم ولا بحترم ولا هتجوز الراجل الي يفكر يقل من قدر الست ولو بكلمة ، ولو بزعيق ، ولو بجمله انتي ست وانا راجل ، لو مش هيكون في رجالة زي ابويا يبقي بلاها جواز ، مع ابويا طبيعي يكون في خلاف بينا بس اقسم بالله عمره ما نايمني زعلانة ، طول حياتي مبشوفهوش غير يعلي مني ويديني دفعة كبيرة اني قوية واحسن حد ابويا الي كان بيدلعني وبيحسسني اني طفلة وكبيرة وناضجة ابويا الي ديما يقولي انتي حلوة وبتحلوي ، كنت بستغرب لما يدخل اوضتي فجأة يحضني ويقولي ياه لو تعرفي بحبك قد ايه ، ابويا الي بيلعب معايا وكأنه صاحبي ، رغم ضغط الشغل عليه عمره ما جه من الشغل مرة مسألش عليا ومقعدش معايا واتكلمنا ف أي حاجة ، دة لما بيشوفني جايبة لبس جديد بيفرحني بيه وبشكلي بيه من جمال كلامه ، ابويا المتفاهم ، الي بغلط ف ياخدني ف حضنه ويعلمني ، الي لما بعيط بلاقيه جنبي وبيقولي " انا بنتي قوية " ، لما بزعل منه اقسم بالله بيحتويني وكأني مراته مش بنته ، انا ابويا بيخاف يزعقلي عشان بيخاف علي زعلي ، طول عمره معودني ع التفاهم ، وان الست عظيمة وقدرها عظيم وإن الي يقل من الست أو يستهزء بكلامها مش راجل ، طول عمره معودني علي مبادئ هي الي خلت يبقي عندي هدف وابقي بكتب شعر وبسعي ان صوتي يوصل للناس ، كان بيختلف الأول مع شعري بس مفكرش ابدا يمنعني منه او يجبرني علي شئ مش حباه ، ابويا الي قالي امبارح انا بنتي هتكون عظيمة قريب وهتسيب اثر ف نفوس الناس هو الي مخليني مكملة ، هو الي فضل واقف ف ضهري لما عمي الي اهو اخوه بقا بيتحداني وبيحاول يوقعني ، هو الي لما قولتله انا مش بخير ، قعد يتكلم معايا ويهزر ويضحك عشان اضحك هو الي نزل جبلي دبدوب وشوكلاته وكأني حبيبته ، رغم خلافتنا بس ميزات ابويا ومواقفه تغطي علي أي خلاف ، فـ لو محبتش راجل يكون كوبي بيست من ابويا مش هتجوز ..

- شكراً يا بابا لأن محدش هيقدر يطمني قدك ولا غيرك ، ملعون ابو الحوجة لأي شخص غيرك ، لأن مفيش امان زيك  

.......

9: " ذلك الوهم السخيف "

شرياني كان مسدود ، دخلتك انت وريدي فـ اتعافي ..

وبقيت بتمشي جوا دمي كأن قلبك ليا دم وأكسجين ..

- الحب كانلي كَمين ، فـ قبض عليا حَبسني اسير فـ زنزانتك ، 

حبيت حياتي لما حبيتك وانت البعيد وَدتني دوامتك .. 

وتعبت فيك اكتر ما قلبي ارتاح ، الجرح فيا مطابش لأ دة اتباح ..

والحزن صار موضتي ، ثم اعتكفت فـ اوضتي .. كالعادة ، 

وانت الي كالعادة ، كداب بيعشق كل يوم واحدة ، الساعة جات واحدة بعد نص الليل ، هددت قلبي بانه لو هيميل هستأصله من جوفه وهدوس عليه عن عمد ، جمدت قلبي - طلبت منك نتفرق جهراً ، أنا قلبي ضل حياته فـ وجودك ، واداك براح فـ بَنتله فـ سدودك ، لما انت مش قد الوعود ، اقسمت ليه وحلفت بوعودك ! 

سلام الله يا فندي خلاص ، معادش في شئ بيجمعنا ..

انا استحملت انا وقلبي وانت زيدت فـ وجعنا ، ختاماً دون ما ازيد فـ الكلام ، انا فعلا بخير وتمام ، وبضحك عادي ميهمش ، 

وحزني هيبقي شئ محدود ، شرياني لما اتسد كانتـ عين وانا طول حياتي بكون ضعيف محسود ، فـ دخلت انت صميمي من يومها - العين صابتني وبكرة أطيب منك ، كل الحكاية وكل ما في الأمر أن ، انا قلبي كان بيإن ..

وبيبكي حرقة وقهر ، أنا شفت عينك نهر وضَيتني منه عشان ، تمنعني أصلي لكني متوضي ، ! بظبط انا دلوقت ، اقنعتني بحُبك ومشيت وقولت " الوقت " ، وانا واقفة اهو فـ النص ، لا عارفة أحبك ولا ، ابعد وارجع نص ، قلبي الغشيم قالي إني بَكمل بيك ، واديني اهو ببكي ، لا عارفة اسيبك ولا ، بايدي اقول اخليك ، هذا الشتا فـ أكتوبر المشتاق ، بدأنا منه ومنه قولنا فراق ، انا روحت كل مكان بيجمعنا ، حضن الأماكن معادش بيساعنا ، قررت انا وقلبي نبعد كتير مع بعض ، كل ما نبعد سوا قلبي يقع ع الأرض ، قصتنا بدأت ليه بنهاية محتومة وأنا الي روحي ضعيفة مهمومة ، وانت الي عايش فل من غيري ، طب ليه ظهرت فـ سيري من الأول ؟ ، وعشان بعادك عني بيطول انا كنت طفلة غبية عاشقة هواك ، ولأن قلبي معاك وقلبك انت بعيد ، أنا قلبي مش هيعيد ، حكايتنا من تاني ، كل الي تاعب روحي دلوقتي ، تفكيري فيك رغم أن روحك - من الاصل بيعاني ، هذا المطر من يوم لقانا اعتبرته شئ مقدس - مشهد رومانسي فـ فيلم في السيما ، بطل بيعشق بنت حلوة حبيته ، واتاري بطل الفيلم كان كداب ، ولا عمره اصلا حبها ولا حتي ينفع مرة تانية عتاب ، ثم الخيال يختلف ، هذا المطر اصبح تراجيديا لسيناريوا كل احداثه فـ وجع ، ولأني ساذجة وبتوجع من الحب ليك ، من يوم ورايح ايدي معادتش فـ ايديك ، وهعيش بدونك كل يوم هيمر ، أنا قلبي اصبح مر من سكرك يالي ، قولت بهدوء يا حلوة اتجلي ، اتجلت الحلوة وياريتها ما اتجلت ، حطيتلي سمك فـ العسل ثم ، روحك سابتني بَسمي واتخلت ، ملعون ابوه الحب لو فينا روح سابت التاني علشان خلاص مَلت ..

.........................................

10- ممنوع الاقتراب 

مكنش ناقصك شئ غير بس حضن صديق ، أو شخص وقت الضيق يبقي السند والضهر ، مش شخص يبعد شهر من غير ما يسأل فيك ، أو شخص ييجي عليك بكلام سخيف ماسخ ، الضعف فيك راسخ والحزن مش بيروح ، قررت جهراً ابوح واشكي الوجع بالشِعر ، فـ نزلت يومها جليم وقعدت عـ الكورنيش الدنيا كانت ليل وفي ضوء بعيد خافت معكوس علي المية ، كات هي حواليا وطيفها بيحاوط بحركته تفكيري ، كان الهوا هادي وكنا فـ اكتوبر ، القهوة كات جاهزة وزيادة كالمعتاد ، ولسة هكتب شعر فـ لقيت بتاعة الورد بتقولي خد وردة ؟ كانت كمان شاردة وعينيها فيهم شئ ، وكأنها حست بطيفها زيي تمام ، طفيت انا الدخان وسألتها سؤالين ؟ أول سؤال بهزار فوقي هاخدها لمين ؟ بصتلي باستغراب وقالتلي عينهولها ، خد مني كل الورد ويا سيدي شيلهولها وفيوم ما تتلاقوا اهديه لست الحسن ، والمؤسف ان الحزن فـ عينيها كان باين ، كان اللسان خاين وكشفلي عن حزنها ، قولتلها مالك بس ؟ قالت محدش حس ، بتعبي كالعادة وبكسرة ، قالت أصل ، حبيت قليل الاصل ، واهو سابني دون اسباب ، سكتت بسرعة وخوف ليبان عليها الضعف البنت كانت طرف لخيوط بتتنسل ، والحب كان كداب بيدور وبيمثل ان الي جي جميل ، كل الي جي دليل علي انه مش راجع ، فـ قالتلي عايز ورد ولا امشي يا أفندي ، قولتها وانا خايف اخر سؤال عندي ؟ هو الطريق هيضيق اكتر من اللازم ؟ فقالتلي ايوة يا صاح ، مشيت بتاعة الورد ، وبفعل هذا الشهر حسيت بلسعة برد ، ولقيتها حضناني ، اذاي بتحضني وهي مش جنبي ؟ بصتلها بشوقي ونهرتها بزعيق اذاي يجيلك قلب تسيبيني وتروحي ، !! وزعيقي كان بعياط ، نسلتي ليه فيا ورمتيني للخياط؟ بصتلي وبشفقة ومكنتش عايزة ترد ، فـ حضنتها بقوة وقولتلها ضميني ، أنا كنت بحضن هوا ومكنتش بتجيني ، يا صبية طال بعدك وانا قلبي ع الحافة ، حطاني فـ الكافة المايلة من يومك ، حابك ولسة بحن يا حبيبتي لعيونك أو ضحكتك ، لونك او حتي برفانك ، تفاصيل كتير بينا مش عارف انساها ، طب هي فين هي ؟ او اين مُرساها !! مليت انا من الوجع وشبعت قولة اه ، بالله تجاوبيني ، زهد البكا عيني ، ولازلت بناديلك واديني بشكيلك فـ قوليلي فين البر ، فـ شتَاكي بلقي الحر وبردت من صيفك ، فـ ارجوكي يا ترجعي يا تسحبي طيفك ..